Ljósið

  Hvaða Þjónusta er í boði þegar þú greinist með krabbamein eða ert aðstandandi.

Það er mikið áfall fyrir alla fjölskylduna þegar fjölskyldumeðlimur greinist með krabbamein.  Þá hefst ferli þar sem einstaklingurinn tekst á við breyttar aðstæður og meðferðir við sjúkdómnum hefjast annaðhvort á spítala eða hjá viðeigandi meðferðaraðila.

Það er nauðsynlegt að huga bæði að andlegu og líkamlegu ástandi einstaklingsins og aðstandenda eftir greiningu, meðan á meðferð stendur og ekki síður eftir að henni lýkur því þá myndast oft tómarúm þegar spítalaferðum fækkar.  Því fyrr sem stuðningurinn kemur inn því betur verður viðkomandi í stakk búinn til að takast á við breyttar aðstæður.

Einstaklingar hafa um nokkra staði um að velja til að fá stuðning og endurhæfingu.  Einhverjum kann að finnast erfitt að vita hvert hann á að snúa sér, hver veitir hvaða þjónustu og hver  réttur þeirra er sem greinast.

Við í Ljósinu viljum með þessari síðu koma með upplýsingar um þá þjónustu sem í boði er, sem mun vonandi  gagnast öllum þeim sem þurfa á stuðningi að halda.

Þeir staðir sem fólk leitar helst til er Landsspítali Háskólasjúkarhús, Ljósið endurhæfingar- og stuðningsmiðstöð og Krabbameinsfélag Íslands.  Þessir meðferðar- og stuðningsstofnanir vinna allar sjálfstætt en hafa samvinnu að því leyti að starfsmenn vekja athygli á því sem í boði er á hverjum stað fyrir sig.  Auk þess eru sjálfstætt starfandi sjúkraþjálfarar, sálfræðingar, geðlæknar, heilsufræðingar og fleiri sem fólk getur leitað til.  Við bendum einnig á síðuna www.brjóstakrabbamein.is en þar er að finna góðar upplýsingar um ráð og stuðning.